Әйелдер жайлы айтылатын әңгіме де, қозғалатын тақырып та көп. Бір қолымен бесікті, бір қолымен әлемді тербеткен әйелдер жайлы нақыл сөздер мен мақал-мәтелдер қаншама. Назарларыңызға бағзы заманнан бүгінге дейін мағынасын бұзбай жеткен ата сөздерін ұсынамыз.

Әйел — үйдің қазығы.

***

Әйел – үйдің көркі,
Еркек – түздің көркі.

***

Асыл әйел – әрі еркек, әрі қатын.

***

Еркек – бас, әйел – мойын.

***

Жақсы әйел – теңі жоқ жолдас,
Түбі жоқ сырлас.

***

Инабатты болса әйел,
Өнегелі болса бала көрікті.

***

Жақсы әйел – ырыс,
Жаман әйел – ұрыс.

***

Үйді қырық еркек толтыра алмайды,
Бір әйел толтырады.

***

Жақсы қатын жаман еркекті адам етеді.

***

Ердің асылы күшінен білінеді,
Әйелдің асылы ісінен білінеді.

***

Әйелді бастан, баланы жастан.

***

Еркекке жүрек керек,
Әйелге тірек керек.

***

Ақылды әйел күйеуінің ойнап айтқанын,
Ойлап талдайды.

***

Ерге жаққан қатын елге де жағады.

***

Жақсы әйел жарының жақсылығын асырар,
Жамандағын жасырар.

***

Әйелдің ақылын жесірінде байқа,
Баланың ақылын жетімінде байқа.

***

Салақ қатынның үйінен,
Сабақты ине табылмас.

***

Айлас қатын мұңдас.

***

Жаман әйел төсегінен белгілі,
Жаман жігіт есебінен белгілі.

***

Жаман ерден жайдағым жақсы,
Жаман әйелден бойдағым жақсы.

***

Жақсы әйел – жарты иманың.

***

Ерін баққан әйел елін де бағады.

***

Ұятсыз әйел тұзсыз ас секілді.

***

Әйелдің абыройы – дақ түспеген ары.

***

Ері өліп ерге тисе – елдің жорасы,
Ері тұрып ерге тисе – беттің қарасы.

***

Бірінші әйел – шекер,
Екінші әйел – бекер.

***

Жаман қатын өлсе, төсек жаңғырады,
Жақсы қатын өлсе, бас қаңғырады.

***

Әйелі азған елдің ертеңі жоқ.

***

Заман бұзыларда әуелі әйел бұзылады.

***

Әйел ашуланса, екі көзіне әлі келеді.

***

Екі әйел басы қосылса,
Үшінші әйелдің соры.

***

Әйелдің күші жоқ, айласы көп.

***

Олақ қатын оймақшыл,
Салақ қатын сауықшыл.

***

Долы қатын – жылауық,
Сұғанақ қатын – сұрауық.

***

Әйелдің шашы ұзын, ақылы қысқа.

***

Алтын басты әйелден,
Бақыр басты еркек артық.

***

Қатын бастаған көш оңбас.

***

Жаман әйел байына
Жалғыз атын сойғызар;
Жақсы әйел жолдасын
Жоқтан құрап тойғызар.

***

Байсыз әйел үйде тұрмас,
Баусыз оймақ қолда тұрмас.

***

Жақсы аттың тісін ашып қарама, киесі болады.
Қатыны жастың жұрт көзінше жасын сұрама, әр нәрсенің жүйесі болады.

***

Тыртақай жігітке,
Жыртақай әйел кез болар.

***

Елді қорғайтын – ерлер,
Ерлерді тәрбиелейтін – әйелдер.

***

Қатын ашуланса қазан қайнатар.

***

Қатынның шайпау болғаны – болмағаны,

Келіннің шайпау болғаны – оңбағаны.

***

Жақсы әйел – ері ұялар іс қылмайды.

***

Әйел асқақтаса, жылайды,
Еркек асқақтаса, құлайды.

***

Әйел ашуланса жеңіледі,
Еркелесе жеңеді.

***

Жетесіз әйел ер қадірін білмес.

***

Жақсы әйел – жігіттің жақсы қылар жаманын,
Ұшқыр қылар шабанын.
Жаман әйел – жігіттің тайдырады табанын,
Тар қылады заманын.

***

Қатын алма, қайын ал.

***

Еркек үйдің – иманы,
Әйел – үйдің жиғаны.

***

Сұлу әйелдің күйеуі қарауыл.

***

Атың жаман болса, сатып құтыларсың,

Әйелің жаман болса, қайтып құтыларсың.

***

Жаман қатын алғанның жауы үйінде,
Екі қатын алғанның дауы үйінде.

***

Екі сиырың болса, айран болар,
Екі қатының болса, ойран болар.

***

Әкесінің ақшасына үйленген,
Әйелінің қадірін білмейді.

Дереккөз: http://massaget.kz/

Ағылшын тілі Ұлттық бірыңғай тестілеуде міндетті пәндердің бірі болуы мүмкін. Бұл туралы ОКҚ баспасөз мәслихатында ҚР білім және ғылым вице-министрі Тәкір Балықбаев айтты.

"(...) Біз әріптестеріміздің тәжірибесін енгізгелі жатырмыз. Ресейде 2021 жылдан бастап ағылшын тілін енгізеді, сондықтан ағылшын тілін міндетті пәндердің бірі ретінде енгізу  бұл да болуы мүмкін. Біз қазіргі уақытта Ұлттық бірыңғай тестілеуімізді өзгертуді жоспарлап отырмыз. Форматының қандай болатынын кейін айтып береміз", − деп түсіндірді Балықбаев үш тілді білім беру моделіне өткеннен кейінгі жағдай туралы сұраққа жауап бере отырып.

Білім және ғылым министрлігінің өкілдері 2015 жылдың қарашасында "2015-2020 жылдарға арналған үш тілді білім беруді дамыту жөніндегі Жол картасын" бағдарламасының бекітілгенін түсіндірді. Бұл бағдарлама үш тілді меңгеруге бағытталған.

2013-2014 оқу жылында үш тілі білім беру аясында орташа білім беру жүйесінде ағылшын тілін бірінші сыныптан бастап оқыту енгізілген болатын. 2016-2017 оқу жылында бұл оқушылар бастауыш мектепті бітіреді. Сонымен қатар 2016-2017 оқу жылында бірінші сыныптан бастап ағылшын тілін оқыту бір сағатқа созылады. Мәселен, бірінші сыныпта аптасына 2 сағат оқытылады, ал қалған екінші, үшінші, төртінші сыныптарда − 3 сағаттан.

2018-2019 оқу жылында, 6 сыныптан бастап еліміздің барлық мектебінде оқу тіліне қарамастан "Қазақстан тарихы" қазақ тілінде, "Дүниежүзі тарихы" орыс тілінде оқытылады.

2019-2020 оқу жылында жоғары сыныптарда мектептің таңдауымен "Информатика", "Химия", "Биология", "Физика" пәндері ағылшын тілінде оқытылады.

"Тапсырмаларымыздың аясында 33 орта мектепте сынақ тәртібінде үш тілді білім беруді енгіздік. Бүгінде үш тілді білім беру 117 мектепте жүргізіліп жатыр. Бұл − 63 мың оқушы немесе елдегі жалпы оқушылардың 2.3 пайызы. Әрине, бұл мектептерде қазақ тілі, орыс тілі және ағылшын тілін тереңдетілген тәртіпте оқыту қарастырылып отыр. Сонымен қатар жаратылыстану ғылымындағы кейбір пәндерді оқыту ағыдшын тілінде жүзеге асырылады", − деді вице-министр.

Оның айтуынша, бүгінде 42 жоғары оқу орнында ағылшын тілінде оқытудың арнайы бөлімшелері ашылған.

Дереккөз:Tengrinews.kz

Өмірдегі маңызды адамдардың бірі – жақын құрбыларымыз. Олар әрдайым мұңымызды тыңдап, қуанышымызға ортақтасады. Егер 8 наурыз мерекесін құрбыларыңызбен тойлаймын деп шешсеңіз, кешті көңілді өткізу үшін бірнеше идея ұсынамыз.

Балалық шақты еске түсіру

Кешке жиналмас бұрын барлығына тапсырма беріңіз. Құрбыларына байланысты немесе өзінің сәби кезінен бастап қазіргі кезге дейінгі ескі әрі қызықты 20 сурет алып келуін сұраңыз. Не үшін екенін айтпаңыз. Суреттердің бір сарынды болмауын ескертіңіз. Бәрі жиналған соң, әркім өзі әкелген суреттерге қарап, 10 минуттан аспайтын әңгіме құрастыруын сұраңыз. Нәтижесінде, барлығы өзі туралы айтып береді және балалық шақты еске түсіріп, көңіл көтересіздер. 

Шығармашылық байқау

Егер құрбыларыңыз шығармашылыққа жақын әрі өз дарынын көрсетуден қысылмайтын болса, шағын көрсетілім сұраңыз. Мысалы: шағын қызықты әңгіме айту, өлең оқу, ән айту және т.б. Күнделікті өмірде өз қабілетімізді көрсете бермейтін кездер болады. Сондықтан құрбыларыңызға қабілетін көрсетіп, ашылуға мүмкіндік беріңіз.

Мастер-класс

Кешті әдеттегідей әңгіме айтумен өткізбей, пайдалы өткізгіңіз келсе, бәріне ұнайтын және соны бірігіп орындайтын іс дайындап қойыңыз. Мысалы, барлығыңыз бірігіп әшекей жасаңыздар. Ең бастысы бұл кешті алдын ала ойластырып, барлық керекті заттарды дайындап қою қажет. Барлығыңыз ұнататын тамақты бірігіп дайындауға болады. Алдыңғы материалда сушиді үй жағдайында жасаудың жолын көрсеткен болатынбыз. 

Караоке

Кешке ең жақын құрбыларымызбен жиналғанда, мінсіз есту қабілетіміз болмаса да, даусымыз керемет болмаса да, уайымдамай-ақ қойсақ болады. Егер үйіңізде караоке болса, сүйікті әндеріңізді бірігіп айтыңыздар. Ол кештің көңілді өтуіне бір себеп болады. Қарапайым DVD-ге микрофон жалғап, караоке диск салып та ән айта беруге болады. 

Тақырыптық кеш

Кешке алдын ала тақырып қойыңыздар. Сол тақырыпты кештің басынан аяғына дейін сақтаңыздар. Бөлмені де сол тақырыпқа байланысты безендіріп, өздеріңіз де соған байланысты киініңіздер. Мысалы: "Атақты жұлдыздар", "Поэзия кеші", «White party», "Мінсіз қыз құпиясы", "Балалық шақ".

Үстел ойыны

Үстел ойындары кішкентай балалардың ойыны деп ойласаңыз, қателесесіз. Қазір мектеп оқушыларына, үлкендерге арналған және отбасылық үстел ойындары да көптеп сатылады. Талғамыңызға қарай кез келген қызықты ойын таңдап алсаңыз болады. 

Естелік үшін сурет

Кеште суретке түсуді ұмытпаңыздар. Суреттер жылы естелік болып қалатыны анық. Алайда кештің басынан аяғына дейін ұялы телефон ұстап отырмаңыздар.

Дереккөз: http://massaget.kz/

Жылдың ең көрікті де қуанышты мезгілі 8 Наурыз Халықаралық әйелдер күні де таяу қалды. Бұл − құшақ-құшақ гүл арқалаған ерлер сабылып, нәзік жандыларды құттықтауға асығатын күн. Ал сіз әлі күнге дейін сүйіктіңізге не сыйлайтыныңызды білмей жүрсіз бе? Мүмкін сіз massaget.kz порталы ұсынған кеңестерге құлақ түрерсіз.

Сүйіктіңізді таңертенмен құттықтау маңызды әрі бұл күтпеген тосын сый болады. Егер сіз сүйіктіңізді кешкісін құттықтайтын болсаңыз, онда мереке бұзылды дей беріңіз. Себебі ғашығыңыз күні бойы сіздің құттықтауыңызды күтіп, жалғызсырайды. Әрине, барлық қыз бірдей емес, әрқайсысы жеке тұлға. Алайда сыйлық таңдауда ескерілетін ортақ дүниелер бар.

Ең тиімді шешім, әрине, гүл сыйлау. Арнайы уақыт бөліп, сүйіктіңізге гүлді өзіңіз келіп сыйласаңыз, қуанып қалары сөзсіз. Ал уақытыңыз болмаған жағдайда хат жазып, гүлді таңертенмен курьер арқылы жіберуге болады.

Классикалық сыйлықтардың бірі − әдемі әшекей бұйымдар. Қымбат тастардан болуы міндетті емес. Арзан емес, бірақ сапалы металлдан жасалған кішігірім сақина немесе алқа сыйлап, әдемі қорапшаға салуға болады. Әйелдер қауымы үшін сыйлықтың безендірілуі және сіздің көңіліңіз маңызды.

Романтикалық кеш. Сүйіктіңізді мейрамханаға немесе кафеге шақырып, көзіне қарап, оны қалай бағалап, ұнататыңызды айтыңыз. Егер ақындық қасиетіңіз болса, жарыңызға арнайы өлең шығарсаңыз болады.

Ерекше сый. Сүйіктіңіз суретке түскенді жақсы көрсе, оған кәсіби фотосессия ұйымдастырыңыз. Осылайша сіз оның сұлулығына қызыға қарайтыңызды көрсетесіз.

Күтпеген тосын сый. Сұлуыңыздың жұмысына немесе оқу орнына үлкен гүл және шармен келіп, оны барлығының көзінше сыйлаңыз. Айналадағылардың көңілі мен көзқарасы қызыға түскенде, ол бақытты болып, сіздің қалай бағалап, сүйетіңізді біледі. Көпшілік назарын ұнатпайтын қыздар да бар, сүйіктіңіз бұл әрекетке көзқарасын алдын ала анықтаңыз.

Бұл кеңестерден кейін жарыңызға 8 наурызға не сыйлау керек екенін жақсылап ойластырыңыз. Сонымен қатар сүйіктіңізге әрдайым көңіл аударып, қамқорлық көрсетуді 8 Наурыз мерекесінде жылына бір рет қана еске алмай, басқа күндері де қуантып тұрыңыз. Сонда ғана сіздің сүйіктіңіз гүлдей жайнап, жарқырап жүреді.

Дайындаған: Дания Күзембаева

Дереккөз: http://massaget.kz/

Ардақты да аяулы аруларымыздың, аналарымыздың мерекесі 8 наурызда жоғары сынып оқушыларының мектеп оқушылары мен ұстаздарына, аналарына арналған «Анасы бар адамдар ешқашан қартаймайды» атты кештің сценарийін ұсынамыз:

Мақсаты: Анаға деген сүйіспеншілік сезімдерін арттыру, ананы құрметтеу, сыйлай білуге, оқушылар бойындағы жеке қабілеттері мен таланттарын дамыту, адамгершілікке, ізгілікке, достықты қастерлей білуге тәрбиелеу.

1-жүргізуші: 
Біз ғана емес, қадір тұтқан бабалар.
Аналардан туған небір даналар.
Ана деген тіршіліктің тірегі,
Армысыздар, қасиетті аналар!

Кеш жарық, қымбатты ұстаздар, аналар, арулар! Көңілдеріңізге көктем шуағындай сезім мен нұр құйып, тағы да 8 наурыз халықаралық әйелдер күні келді. Осынау көркем мерекенің қай кезде де орны бөлек. Олай болатыны, аналарға деген ыстық сезім, алғыс пен құрмет ешқашан сөнбек емес. Олар – өмірдің гүлі, көңілдің жыры, әр отбасының алтын діңгегі. Мынау тынымсыз тіршілік пен кең дүниенің өзі тек аналармен ажарлы. Бүгінгі арайлап атқан нұрлы таңмен бірге әрбір сәби жүрегі өзің деп соқса, бүгінгі мерекелік «Анасы бар адамдар ешқашан қартаймайды» атты кешімізді ашық деп жариялаймын! Қош келіпсіздер! 

2-жүргізуші: 
Десек те уақытпенен жарыспайды,
Қияға қиялменен қарыштайды.
Шәкірттер шын жүректен тебіреніп
Өнерлерін анаға бағыштайды, - дей келе ортаға ...сынып оқушыларының сіздерге арналған тартуларын қабыл алыңыздар. Барлығы хормен «Мерекелеріңізбен» деп айтады. 

1-жүргізуші: 
Ақ тілекті ағытып бір тастайық,
Аналардың мерекесін бастайық.
Көздеріңнен көрем шаттық арайын,
Өтсін солай әрбір күнің, әр айың, – дей келе құттықтау сөз кезегі мектеп директоры (апайға немесе ағайға) беріледі.

2-жүргізуші: 
Көңілің Алатаудың ақ қарындай,
Мейірімің күннің шуақ шақтарындай.
Қалайша аяулы ана тына алармын,
Ән болып сағыныштан ақтарылмай, - деп абзал аналарымыз бен қырмызы қыздарымыздың құрметіне_________орындауында «Анашым» атты әнін қабыл алыңыздар!

1-жүргізуші: 
Әлемдегі ең ақылды, дана боп, 
Нұрын шашар жақсыларға пана боп. 
Кім-кім болсын сені алақанында, 
Мейірлене ешкім сүймес ана боп. 

2-жүргізуші: Алақаны жылылықтан балқыған, 
Бір күлкісі бар әлемді шарпыған. 
Бұл сезімге ие болған барша жұрт, 
Әрқашан да мол байлықта шалқыған, – дей отырып ұл-қыздарыңыздың жүрекжарды тілектерін қабыл алыңыздар!

1-оқушы: Жарты жанын бөліп беріп балаға, 
Ақ сүтімен әлдилеген бар ана. 
Қиын күндер кешсе дағы басынан, 
Міндет етпей жүрген адам сол ғана. 

2-оқушы: Қасиетті жұмақ кілті табылар, 
Алыс кетсең алаңдар да сағынар. 
Аналарын сыйламаған адамдар, 
Қашан болсын өз ісінен жаңылар. 

3-оқушы: Анасыздар, әр үйге панасыздар,

Бала десе от болып жанасыздар.
Сәтті басса ұрпағың,- мерей тасып,
Қыз күлкісін сусын қып қанасыздар.

Анасыздар — Ақ Еділ, Жайықсыздар -
Жүзе алмайды өтінде қайықсыздар.
Маздататын, жүректе от лаулататын,
Әр үйдің Күні десе, лайықсыздар.

4-оқушы: Аналық алтын борышың,

Жүр әлі менің арқамда.
Көтеріп сізді сол үшін,
Меккеге күнде барсам ба?!

Ақ маңдайыңның әжімі,
Жылдардың ізі шуақты.
Омырауыңның ақ сүті –
Өтелмес қарыз сияқты.

5-оқушы: Аппақ қар болып шашың да,
Ағарып кетті-ау, жан анам.
Ақындығым да, даңқым да,
Қормалым сенің садағаң.

Өсіру мені о бастан,
Машақат еді не деген.
Ақ армандарды қууға,
Ақ тілегің ғой жебеген.

6-оқушы: "Əке, əке, сен айтатын жақсы сөздер көп еді,
Айтшы енді, ана жайлы ең жақсы сөз не?" деді,

Ана жайлы...
Ана жайлы пайғамбарлар сəлемі,
Ана жайлы ақындардың өлеңі.

Ана жайлы - қара жердің төзгені,
Ана жайлы - уақыттың безбені,
Ана жайлы айтылмаған бір сөз болса əлемде,
Ол да ананың айта алмаған сөздері.

Ана жайлы жақсы сөзді есту үшін тыңда, ұлым,
Тыныштықты, Тауды, Көлді, Ай сəулесін, Күн нұрын,
Ана жайлы сенің тəтті қиялдарың, арманың,
Ана жайлы менің барлық шындығым.

Мен айтатын жақсы сөздер көп еді,
Мен де анамды жақсы көрем, себебі!
Білесің бе, бұл əлемге адамдар,
Ана жайлы айту үшін келеді!

Адамзаттың ең бір асқақ бар əні,
Жыр еткемен, пір еткенмен ананы,
Бұл өмірді қалай сүріп өткені - 
Ана жайлы айтқан сөзі болады.

Ана жайлы - кең дүние - бесігің,
Ана жайлы аманат пен кешірім,
Анаң үшін ең жақсы сөз дүниеде - 
Ұлым, сенің есімің!.. (Ерлан Жүніс)

1-жүргізуші: 
Теңіздей тербетіліп көл бетінде,
Бишілер билеп кетті тербетіле.
Аққудай қалықтаған теңіздегі,
Бишілер өнерлерін көрсетуде, - дей отырып келесі кезекті мың бұралған бишілерге береміз. 

2-жүргізуші: 
Ана деген – бастауы ұлылықтың
Ана деген - рәмізі сұлулықтың
Ана деген - бір жыр бар шырқалатын
Асқақтатар биікке ұрпақ атын
Олай болса _________ қарсы алайық
Дауысына сүйсініп тамсанайық
Ерке ұлдың талантына тәнті болып,
Уа, халайық, жұмыла қол соғайық!
Ән: Орындайтын: ______________

1-жүргізуші: 
Әркімнің де өмірден аласы бар,
Аласы бар адамның анасы бар.
Мерекесін құттықтап аналардың,
Өнерлерін жолдайтын апалардың баласы бар деп «Сегіз сері» КВН командасын ортаға шақырамыз. (Жігіттерден құралған топ аналар, ұздаздар, қыз-келіншектер жайында қызықты әзілдер айтады).

2-жүргізуші: 
Домбыра, күмбірлеші күніндей боп қазақтың
Өзіңменен бірге жүргем ұзақ жолында азаптың
Үніңменен жазылады жарасы
Үніңменен жалғанады ұрпағым, – деп ақын ағаларымыз жырлағандай ________________  орындауында «Адай» күйі.

1-жүргізуші: 
Ару - Ана өмірдің асылдары,
Жайнасын көңілімнің жасыл бағы.
Сендер үшін ән мен жыр шырқалуда,
Сендер үшін мереке шашулары, - дей отырып __________________ орындауындағы тамаша әнді қабыл алыңыздар.
2-жүргізуші: 
«Бала, бала, бала» деп,

Бізді өсірген анашым.

Гүлге толып, құшағың,

Бақытты бол, анашым.

1-жүргізуші:  
Қамымды ойлар күн- түні,

Анам- менің көктемім.

Ақтай алсам, үмітін,

Арманыма жеткенім, – дей отырып ...сынып ұлдарының ұзтаздар мен аналарға арнап жасаған шағын дүниелерін қабыл алыңыздар! (Сынып ұлдары аналары мен ұстаздарының қызықты суреттері мен даналы сөздер арқылы слайд жасап, көрсетеді).

2-жүргізуші:  
Күнінде гүл көктемнің нұрын шашып,
Жасқанбай әр қадамын нық - нық басып,
Биімен көрерменді тәнті ететін
Арулар келді міне толқып, тасып. Ортада «Қазақ» биі қарсы алыңыздар!

1-жүргізуші: 
Аналарды сүйеміз,

Ақылын ойға түйеміз.

Аналарды ардақтап,

Әдеппен бас иеміз!

2-жүргізуші: 
Ана деген жан екен,

Ана деген ән екен.

Ұстаз-ана, әжелер,

Үстем болсын мерейің, – деп ортаға ...сынып оқушыларының аналарын шақырып, келесі кезекті «Тапқыр бала» ойынына береміз. (Оқушылар көзін орамалмен байлаймыз. Өз аналарын табуы керек).

1-жүргізуші: Ана – барлық қиындықты жеңетін сарқылмайтын күш, тіршіліктің қайнар бұлағы. қазақ әйелінің дастарханы тоқ, қонағы ырза, дүниесі түгел. Олар үшін бірінші орында отбасының берекесі тұрады. Бөбегін бесікке бөлеп, әлдилеп аялаған ана бақыт құшағында емес пе?!

2-жүргізуші: Жанұяның жылуын суытпай, тал бесікті тербей отырып, тебірене толғар бесік жыры арқылы аңыз ертегілері мен жақұт жырлары арқылы ұрпағының бойына адамдық қасиеттерді дарытып отырған аналардың құдіретті сезімдеріне арналған әсем әнді қабыл алыңыздар. __________орындауында «Анамызға мың алғыс» әні.

1-жүргізуші: 
Бір өзіңнен бастап өмір жолдарын,
Жүрегіңе, жүрегімді жалғадым.
Өзің мына сыйға берген өмірде
Ақ сүтіңді ақтап өту - арманым.

2-жүргізуші: 
Барша ана, құтты болсын мерекеңіз
Әрқашанда ана сізбен берекеміз.
Ақтасақ ақ сүтіңді, асыл анам.
Сонда біз кісілікке теңесеміз, – деп келесі кезекті оқушылар арнауына береміз. (Үш оқушы шығып, анаға, ұзтазға, қыздарға арнауын немесе шығарма оқиды).

1-жүргізуші: 
Кең кеудеңе гүл болып тағыламын,

Жұлдызындай көгінде жағыламын.

Алыс кетсем аңсаймын сағынамын,

Анам менің, асылым, лағыл әнім. Алдарыңызға әнші қыздарыңыз ____________орындауындағы «Ана» атты әнін қол соғып қошеметтеп қарсы алыңыздар!

2-жүргізуші:  
Ардақты ана, аяулы ана, қымбаттым,

Тәтті ұйқыңды бөліп талай түн қаттың

Өміріме нәрін берді ақ сүтің,

Кең құшағың аясындай гүл бақтың.

Ер жеткізіп елге берген баласын,

Ақылдысың, ардақтысың, данасың!

Қарайтыным қас-қабағың бір сенің,

Қайратыңнан қайта көрме, анашым!

1-жүргізуші: 
Дүниедегі ең кемеңгер дананы

Ана табады, аялайды, бағады.

Сол үшін де құдіретіне бас иіп,

Құрметтейік қасиетті ананы, – деп көрермендеріміз аналар жайлы даналық сөздерді қаншалықты біледі екен? Байқап көрейік? Ойын шарты: Біз мақалдың басын айтамыз, сіздер жалғасын табуларыңыз керек. Ең көп тапқан көрерменімізге сыйлығымыз бар. 

1. Алып анадан туады,

    Ат биеден туады.

2. Ананың алақаны – балаға айдынды қоныс.

3. Ана сүтін ақтамағанды ешкім жақтамайды.

4. Атыңа ауыр жүк артпа,

   Анаңа ауыр сөз айтпа.

5. Анасын сыйламағанды адал деме,

    Ұстазын сыйламағанды адам деме.

6.Тапқан ана емес, баққан ана.

7. Анаңа рақым етпесең,

    Балаңнан рақым күтпе.

8. Анаға баланың алалығы жоқ.

9. Ердің анасы – елдің анасы.

10. Ананың ізін қыз басар,

     Әкенің ізін ұл басар.

11. Анасын сүйгеннің баласын сүй.

12. Анасын көріп қызын ал,

     Аяғын көріп асын іш.

1-жүргізуші: 
Аяулысың, ауылымның асылдары,

Жайнасын көңілдердің жасыл бағы.

Сендер үшін ән менен күй, өлең мен би,

Сендер үшін мереке шашулары,-деп алдарыңызда «Үнді» биі.

2-жүргізуші: 
Көңілің Алатаудың ақ қарындай,

Мейрімің күннің шуақ шақтарындай.

Қалайша аяулы ана тына алармын

Ән болып сағыныштан ақтарылмай,-деп абзал аналарымыз бен ардақты ұстаздарымызға арнап «Ана туралы жыр» әні. (Осы уақытта оқушылар аналар мен ұзтаздарға гүл шоқтарын ұсынады).

1-жүргізуші: Осы айтылғандардың бәрі шындық, бәрі шын, аналар ажалдан күштірек, жапанға бір тоқтамсыз данышпандарды, ақындарды, ерлерді тауып беретін аналар. Барлық жақсылықты себетін де аналар. Ендеше сол аналар алдында бас иелік! 
Мерекелік кешімізді қорытындылау үшін сөз кезегін ________________ береміз.

2-жүргізуші: Қайран ана, өз перзентін әдемі не ұсқынсыз, ақылды не ақымақ, мейірімді не рақымсыз, кесір-қырсық болса да бәрібір шексіз сүйеді. Дүниеде ананың көз жасынан салмақты, одан ауыр таразы басын басатын ештеңе жоқ. Өйткені ананың көз жасы өзінің киесімен ауыр.

1-жүргізуші: Ана баланы тоғыз ай көтеріп, толғатып, дүниеге келтіріп қана қоймайды, оны көзінің қарашығындай қорғап, аялап өсіріп аяғынан тік тұрғызады. Өмір есігін жаңа ашқан баланың бойына елінің рухын сіңіретін, жылуын тарататын ана. Ана баланың амандығын, бақытты, абыройлы болуын тілейді. Бойымыздағы ең жақсы қасиеттер бізге алдымен анадан тарайды. Ендеше, анамызды сыйлап, құрметтейікші! Осымен бүгінгі «Анасы бар адамдар ешқашан қартаймайды» атты мерекелік кешіміз аяқталды. Көңіл қойып тамашалағандарыңызға көп - көп рахмет! Келесі кездескенше аман-саболыңыздар! 8 наурыз құтты болсын! Тағы да мерекелеріңізбен!

Дереккөз: http://massaget.kz/

Көктеммен бірге көңілге қуаныш пен шаттық әкелетін аяулы аналарымыздың және аруларымыздың төл мерекесін бәріміз де асыға күтеміз. 8 наурыз мерекесінде ерлер сыйлық іздеп, тосын сый жасауға тырысады. Алайда сүйіктіңізді мереке күні қуантамын деп, керісінше ренжітіп алмаңыз. Себебі кейбір сыйлықтарды сыйламаған жөн.

Арықтауға арналған құралдар немесе фитнеске абонемент. Егер сүйіктіңіз дене бітіміне көңілі толмайтын болса, сіз оған араласпауыңыз керек. Тіпті сіз оның соңғы 1-2 аптада тәтті тағамдардан бас тартпайтынын байқасаңыз да, сүйіктіңізге ешқашан да таразы cыйламаңыз.

Әжімдер мен безеулерге қарсы иісмайлар. Кез келген әйел ер адам өзінің бет-әлпетіне аса мән бермейді деп ойлайды. Ал егер сіз сүйіктіңіздің кемшіліктерін байқағаныңызды түсінсе, әрине, оны ренжітіп аласыз. Сондықтан да жігіттердің ұсақ-түйек нәрселерді назардан тыс қалдыру керек екенін ұмытпаңыз.

Үй жануарлары. Сүйіктіңіз үй жануарларын қатты жақсы көрсе де, ол 8 наурызда өзіне сыйлық ретінде мысық немесе итті алғысы келмейді. Әйтпесе, сыйлығыңыз сол күні-ақ өзіңізбен бірге қайтады.

Иіссу немесе косметика. Ойлап қарасаңыз, иіссу немесе косметиканы сыйлау кең таралған. Алайда иіссу таңдауда талғамыңыз болса. әлде сүйіктіңіздің қандай ерін далабын қалайтынын білсеңіз, қорықпай ала берсеңіз болады. Дегенмен таңдау жасағанда күмәндансаңыз, сатушымен ақылдасқан дұрыс.

Жейде немесе белдемше. Сіздің көзіңіз қаншалықты өткір болса да, сүйіктіңіздің киім мөлшері XS немесе S екендігіне кепілдік берілмейді. Сондықтан тәуекелге бармаңыз, қателесіп қалу қаупіңіз бар.

Екі адамға арналған туристік жолдама. Әрине, бұл тосынсый болары сөзсіз. Бірақ бұл идеядан бас тартуға бірнеше себеп бар. Біріншіден, мүмкін сүйіктіңіздің ол уақытқа басқа жоспарлары бар шығар. Екіншіден, сіз жолдаманы Турцияға алып, ал сүйіктіңіз Парижге баруды армандап жүрген болар. Сондықтан мұндай сыйлық жасаудың алдында сүйіктіңізбен немесе құрбысымен ақылдасқан жөн.

Ақшалай сыйлық. Әрине, сыйлық алуға уақытыңыз болмай немесе сыйлықты онлайн жеткізу жағынан қиындық тууы мүмкін. Бірақ ең басты сыйлық − ол сіздің ілтипатыңыз. Аруларымызға көңіл бөлуді ұмытпаған жөн. Сол себепті конвертке салынған ақшаны сүйіктіңіз дұрыс көңіл бөлмегеніңіздің белгісі деп түсінуі мүмкін.

Тұрмыстық техника. Қандай жағдайда да 8 наурызда сүйіктіңізге шаңсорғыш, тоңазытқыш немесе қысқа толқынды пеш сыйламаңыз. Ондай бұйымдарды басқа күні де сыйлауға болады. Кез келген әйел бұл күні өзін «үй шаруасындағы әйел» статусында сезінгісі келмейді.

Дегенмен адамның ыстық ықыласынан асқан сыйлық жоқ. Сондықтан сүйіктіңізді әрдайым қуантып, тосын сыйлар жасауды ұмытпаңыз. 

Дайындаған: Мөлдір Қалықова

Дереккөз: http://massaget.kz/

Алда 8 наурыз - Халықаралық әйелдер күні мерекесі жақындап келеді. Мереке алдында аяулы аналарымыз туралы айтылған мақал-мәтелдерді топтастыруды жөн көрдік. Ендеше, бағзы заманнан бүгінге дейін мағынасын бұзбай жеткен ата сөздерін назарларыңызға ұсынамыз.

***

Ана – біреу, ағайын – алтау.

***

Алып анадан туады,

Ат биеден туады.

***

Ердің анасы – елдің анасы.

***

Анасын сүйгеннің баласын сүй.

***

Ананың ізін қыз басар,

Әкенің ізін ұл басар.

***

Анасын көріп қызын ал,

Аяғын көріп асын іш.

***

Ананың алақаны – балаға айдынды қоныс.

***

Ана сүтін ақтамағанды ешкім жақтамайды.

***

Атыңа ауыр жүк артпа,

Анаңа ауыр сөз айтпа.

***

Ана баласын арыстанның аузынан алады.

***

Мылқаудың тілін анасы біледі.

***

Анасын сыйламағанды адал деме,

Ұстазын сыйламағанды адам деме.

***

Ана тілін алмаған – арсыз.

***

Тапқан ана емес, баққан ана.

***

Ананың қақы – Құдайдың қақы.

***

Анаңа рақым етпесең,

Балаңнан рақым күтпе.

***

Анаға баланың алалығы жоқ.

Дереккөз: http://massaget.kz/

"Қыз қонақ" деп сыйлаған қазақта қызбаланың орны ертеден қадірлі, бағалы болған. 8 наурыз – Халықаралық әйелдер күні қарсаңында бағзы заманнан айтылып келе жатқан қыздар жайындағы мақал-мәтелдерді ұсынуды жөн көрдік.

Ұлым – ұяға,
Қызым – қияға.

***

  Қыз — ауылдың көркі,
Құндыз болса, бөркі.

***

Қыз жоқ жерде қызық жоқ.

***

Қызға бергенді Қыдыр өтер.

***

Қызды таныс алады,
Таныс алмаса, қоныс алады.

***

Қызыңды жеріне бер,
Жер ыңғайы келмесе, еріне бер.

***

Қызды қартша сына,
Атты жігітше сына.

***

Қызым үйде, қылығы түзде.

***

Астың дәмін тұз келтірер,
Ауылдың сәнін қыз келтірер.

***

Бір жақсы қыз,
Екі жаман ұлға татиды.

***

Жерді шым, елді қыз біріктіреді.

***

Суды құм бөгейді,
Дауды қыз бөгейді.

***

Қой жүрген жер – береке,
Қыз жүрген жер – мереке.

***

Ақылды қызға ана көп,
Аяулы жанға пана көп.

***

Бесін болса, күн тұрмас,
Күйеу келсе, қыз тұрмас.

***

Шыққан қыз шиден тысқары.

***

Теңін тапса, тегін бер.

***

Қалыңсыз қыз болса да,
Кәдесіз қыз болмайды.

***

Қыздың баласындай, қолдың саласындай.

***

Қысыла-қысыла қыз болдым.

***

Қыз күнінде бәрі жақсы,
Жаман қатын қайдан шығады.

***

Қымызды кім ішпейді,
Қызды кім айттырмайды.

***

Ас таңдасаң, аяғына қара,
Қыз таңдасаң, анасына қара.

***

Күндес көргеннің қызын алма.

***

Жақсы қыз біреу келсе, есік ашар,
Жаман қыз біреу келсе, төрге қашар.

***

Тұзды көп сақтама, су болады,
Қызды көп сақтама, күң болады.

***

Қарты бардың хаты бар, 
Қызы бардың назы бар.

***

Өзі болған қыз төркінін танымас.

***

Жақсы қыз – жағадағы құндыз,
Жақсы жігіт – төбедегі жұлдыз.

***

Біреудікі біреуге қыздай көрінер.

***

Отырған қыз орнын табар.

***

Аш кісі май таңдамас,
Кәрі қыз бай таңдамас.

***

Ойының бекімі жоқ қыз қырық құбылады.

***

Қызды жеңге,
Жеңгені теңге бұзады.

***

Қызбен алыспа, қысырақпен жарыспа.

***

Ақылды қыз білімге жүгірер,
Ақылсыз қыз сөзге ілігер.

***

Қыдырымпаз шешенің қызы бастаңғышыл.

***

Жазымсыраған қыстан без,
Жасымсыраған қыздан без.

***

Қызы бар ауылдың қыдыры бар.

***

Қыздың жолы жіңішке.

***

Қызым, саған айтамын,
Келінім, сен тыңда.

***

Ананың көңілі қызында,
Қызының көңілі қызылда.

***

Ұлға – түтін, қызға – күтім.

***

Сұлу жігіт – ел көркі,
Сұлу қыз – үй көркі.

***

Қыздың көркі – кигені,
Жігіт көркі – сүйгені.

***

Қыз бала – өріс.

***

Қыздың тамағы қылдай.

***

Қыздың қырық жаны бар.

***

Қыз ауыр ма, тұз ауыр ма?

***

Қыз өссе – үйге жұт,
Ұл өссе – үйге құт.

***

Қызды ауылдың иті жатпас.

***

Қыз қылығымен сұлу.

Дереккөз: http://massaget.kz/

Көктем мезгілі жер дүние жаңарып, жаңашылдыққа бастайтын кез. Сонымен қатар әйел заты құлпырып, әдемілене түсетін уақыт. Өзгергіңіз келе ме? Өмір сүру қағидаларыңыз ұнамай ма? Ендеше бірге бастайық.

1. Көктем мезгілі ренішті ұмытуға қолайлы кезең.

2. Көптен бері тіл-табыса алмаған адамдармен қауышатын кезең.

3. Шаш үлгіңіз ұнамса, өзгертіңіз.

4. Ашық түсті кимідерді алуға ұмтылыңыз.

5. Көп уайымға салынбаңыз, қайғыны ұмытыңыз.

6. Өзіңізге ұнаған, қалаған затыңызды алыңыз.

7. Ерте тұруға дағдыланыңыз.

8. Бос уақытыңыз табыла қалса, өзіңізге көңіл бөліңіз.

9. Спортпен шұғылданыңыз.

10.Әрбір әйел өзінше сұлу, кербез, әдемі. Өзін сұлу емеспін дейтін жандар, өзіне көңіл бөле аламай жүрген адамдар.

Көктем біздерді бақытты болуға, жаңаруға ынтықтырады. Әйел затын сұлу болуға шақырады және өзгеруге нағыз қолайлы мезгіл. Ой түбінде жүрген жандарға шабыт пен жүректің сылдыр сазын сыйлайды.

Ал көктем мезгілі сіздерге несімен ерекше?

Дереккөз: anabol.kz

Қыз бала тәрбиесі қашанда қоғамның назарынан тыс қалып көрген жоқ. Атам қазақ ешбір жарғы, нұсқау жазып әуре болмай-ақ әрі қысқа, әрі нұсқа нақылдармен тәрбие тағылымының тамаша үлгісін түйіп айтып отырған. «Қыз-қонақ» деп төрінен орын беріп, қыздарды алтынның сынығына балап өсірген.

Халық арасында бойжеткен қыз ажарына қарай алтыға бөлінген.

1. Әдемі қыз – баппен сөйлеп, биязы күліп, жақсы-жаманның жөнін біліп тұратын.

2. Көрікті қыз – істі үйіріп, сөйлесе бұйырып, баурап алатын, бірден көзге түсе қоймайтын.

3. Әсем қыз – жүзі жылы, өзі ұяң, тәні нәзік.

4. Ажарлы қыз – дене бітімі жинақы, сөзі салмақты, ісі тиянақты.

5. Шырайлы қыз – көз жанары өткір, бет әлпеті бал-бұл жанған, тәні шымыр.

Өскемендік оқушылар мектептерінде сатушысы жоқ шағын дүкен ашты.

Сауда сөресіне бірнеше сусын және тәтті тағамдар қойылды. Ал есігіне тауарлардың бағасы мен бұл қызметтің адалдықты тексеруге арналған әдіс екендігі түсіндіріліп жазылды. Талап бойынша кез келген тауарды сатып алғысы келген оқушы оның ақысын арнайы жәшікке тастап кетуі тиіс. Басында дүкен 20-30 пайыз шығынға ұшырған. Алайда кейіннен сатып алушылар өздерінің адалдықтарын білдіріп, тауар құнын жәшікке қалдырып отырған. Сондықтан жүйе өз нәтижесін берді. Алғашында тек ғылыми-зерттеу жобасы ретінде ашылған дүкен енді мектеп ішінде біржолата жұмысын жалғастыра бермек. Өйткені бұл бастаманың адамды жауапкершілікке әрі әділдікке баулитыны байқалған.

Айғаным Сейітова, мектеп оқушысы: - Бұл акция балаларды шыншылдыққа, өзін жақсы ұстауға, өтірік айтпауға үйретеді. Балалар осы жобаның аяғында өздері шыншылдықты үйренеді деп ойлаймыз. Салған қаржының барлығы 100 пайыз өзін-өзі ақтауда.

Дереккөз: 24.kz

Назарбаевтың тапсырмасынан кейін Қазақстан бескүндік оқу аптасына көшеді. Бұл туралы ҚР білім және ғылым министрі Ерлан Сағадиев айтып берді.

"Қазір біз тапсырманы орындап жатырмыз, сондықтан да сіздерге бұл жөнінде кейін толығырақ айтып береміз. Менің ойымша, бұл дұрыс тапсырма. Дайындыққа көп уақыт кетеді деп ойламаймын. Алдағы айда бірдеңе белгілі болып қалуы мүмкін. Менің ойымша, мұндай жүйеге көшуге 3-4 жыл уақыт керек. Президент тапсырма берді, сондықтан да өзгерісті күту керек", - деді Сағадиев.

Айта кетейік, Назарбаев бұған дейін мектептерде бескүндік оқу стандартын енгізу мәселесін талқылауды тапсырған болатын. "Дамыған елдердің мектептерінде бескүндік оқу аптасы енгізілген. Бұл баланың қайтадан қалпына келіп, педагогтың демалып, сабаққа дайындалуына мүмкіндік береді. Олардың кейбірінде, тіпті, сабақ аптасына төрт күн ғана болады. Мұндай форматқа өту - дамыған елдерге ортақ тренд", - деді Мемлекет басшысы.

Дереккөз: tengrinews.kz

ҚР Білім және ғылым министрлігі жалпы білім беретін мектептердің  9-12 сынып оқушылары үшін Кәсіптік бағдар күнін енгізуде. Аталған шаралар оқушылардың оқу барысына кедергі келтірмей, жоғары оқу орындарын жарнамалауды жүйелік реттеу мақсатында енгізілген.

Енді кәсіптік бағдар күні әр айдың 2 және 4-сенбі күндері 2 академиялық сағат ішінде өтетін болады. Мектептер үшін бірыңғай стандартты кесте жасалады, ол бойынша жоғары оқу орындары мектептерде оқушылармен кездесу өткізу жөнінде өтінім береді. Жалпы білім беретін мектептер өтінім берген жоғары оқу орындармен тоқсан сайын Кәсіптік бағдар күнін өткізу кестесін жасайды.

Егер жоо оқушыларды тестілеуден өткізуді жоспарласа, онда оны мектептен тыс немесе жоо мен колледжде өтетін Ашық есік күндері шеңберінде өткізуге тиіс.

Кәсіптік бағдар күні шеңберінде өтетін кездесулер әр жоо-ға мектептерде ақпараттық жұмысты өткізуге құқық бере отырып, кешенді кәсіптік бағдарлау жүйесін құруға мүмкіндік береді. Бітіретін сыныптар оқушылары өзекті мамандықтар мен білім алу мүмкіндіктері туралы ақпарат алады. Кездесулерді сенбі күні өткізу ата-аналарға балалармен бірге жоо-лармен және колледждермен танысуға жағдай жасайды.  

Дереккөз: edu.gov.kz